Natasha Nasi, Shefe Administrate & Foreign Right Manager. Lindi në vitin 1947. Është ekonomiste me eksperiencë shumëvjeçare. Karrierën e saj e ka nisur si nëpunëse banke, pastaj ka punuar për një kohë relativisht të gjatë si ekonomiste pranë Drejtorisë së Përgjithshme tëTurizmit në Tiranë. Gjatë viteve '80 ka punuar pranë Agjencisë së Turizmit Shqiptar, ndërsa në vitet '90 e në vazhdim pranë Institutit të Studimeve Arkeologjike Tiranë. Aktualisht kryen detyrën si Shefe Administrate & Foreign Right Manager pranë Shtëpisë Botuese Elite Tiranë, duke përballuar me sukses mjaft detyra që kanë të bëjnë me dinamikën dhe veprimtarinë e saj të përditshme, evidencimin, administrimin e përgjithshëm dhe trajtimin e problemeve finaciare, shpërndarjen dhe shitjen e librit, lidhjen dhe ndjekjen e kontratave për respektimin e të drejtave të autorit brenda e jashtë vendit, si dhe krijimin e një atmosfere mirëbesimi me autorë e bashkëpunëtorë të rinj me qëllim për ta zgjeruar më tej veprimtarinë botuese në të ardhmen. .

Gentjana Halo, Menaxhere Kryesore për Projektin Diaspora Shqiptare – Seksioni i Kanadasë – është e interesuar për të grumbulluar të dhëna të ndryshme për zbatimin e Projektit: “Komuniteti Shqiptaro-Kanadez në Ontario – Quebec, si dhe Provincat e tjera deri në British Columbia (Vancouver)”, duke shfrytëzuar burime arkivore zyrtare, sikurse janë: Agjensia Kombtare e Statistikave (Canadian Statistics), Libraria Kombëtare dhe Arkivi i Shtetit (Library and Archives Canada), si dhe bibliotekat publike, institucionet e ndryshme fetare apo organizma e shoqata social-kulturore që veprojnë në gjirin e Komunitetit Shqiptaro Kanadez. Në të njëjtën kohë, edhe kontaktet e drejtëpërdrejta me Komunitetin Shqiptaro-Kanadez, si dhe familjarët e të afërmit e tyre në Shqipëri, takimet dhe bisedat konfidenciale me individë të veçantë të moshave e niveleve të ndryshme, frekuentimi i mjediseve e lokaleve ku ata jetojnë, punojnë dhe zhvillojnë biznesin e tyre në Kanada, apo i vendeve ku ata organizojnë manifestime ose veprimtari të ndryshme social-kulturore, përbëjnë gjithashtu një burim të rëndsishëm për sigurimin e të dhënave shumë të nevojshme për botimin e këtij libri me vlera mbarëkombëtare. Gjithsecili që disponon të dhëna me interes për historinë e Shqiptarëve të Kanadasë, veçanërisht për emigrantët e parë shqiptarë në Kanada, si: emra konkret, nëse dihen, qytetet ku u vendosën, numri i tyre, trevat shqiptare nga vinin, etj, janë të lutur që t’i dërgojnë në Via E-mail: info@elitelibri.com; anasi@elitelibri.com; ose me postë në adresën: Shtëpia Botuese Elite, P. O. Box: 8293, Tiranë, Albania.

Jolanda Cmeta, Sekretare për Shtypin & Korrektore Letrare. Lindi në vitin 1978. Ka mbaruar studimet e larta në Fakultetin e Gjuhëve të Huaja në Universitetin e Tiranës dhe është diplomuar Specialiste e Gjuhës dhe Letërsisë Italiane. Ka njohuri shumë të mira edhe për gjuhën letrare shqipe, gjë që është rezultat i punës së saj këmbëngulëse si dhe prirjeve letrare. Është autore e një vëllimi me poezi që e ka paraqitur për botim pranë Shtëpisë Botuese Elite. Gjatë viteve 1998-2000 ka bashkëpunuar me Shtëpinë Botuese Elite, duke kryer detyrën si koordinatore për lidhjen e kontratave dhe korrektore letrare. Ndërmjet veprave të korrektuara prej saj, mund të përmenden: Ndërgjegjja e Zenos, shkruar nga Italo Svevo, botuar nga Newton Compton Editori, Romë; Leksione të Shkencës së Financave, shkruar nga Mario Leccisotti, botuar nga G. Giappichelli Editore,Torino; Komuniteti Shqiptaro-Amerikan në Konektikat, përgatitur për botim nga Shtëpia Botuese Elite. Aktualisht vazhdon të punojë si bashkëpunëtore e jashtme e Shtëpisë Botuese Elite, duke u angazhuar në përkthimin e disa autorëve të mirënjohur italianë, si Alba Decespedes, Elsa Morante, etj. Zotëron gjuhët e huaja: italisht dhe anglisht; komunikon edhe në frëngjisht.

Alketa Zazo, Përkthyese & Redaktore. Ka lindur në Tiranë në vitin 1973. Ka mbaruar studimet e larta në Fakultetin e Mjekësisë në Universitetin e Tiranës dhe është diplomuar Mjeke e Përgjithshme. Aktualisht vazhdon studimet pasuniversitare për Administratë Publike. E apasionuar pas letërsisë, psikologjisë së fëmijëve dhe gjuhëve të huaja - njohëse shumë e mirë e Anglishtes, Italishtes dhe Frëngjishtes. Ka punuar për Degën Shqiptare të Bordit Ndërkombëtar të Librave për Fëmijë dhe të Rinj (International Board on Books for children and Young People) për 7 vjet me radhë duke përkthyer vazhdimisht pjesë artistike nga më të njohurat të letërsisë botërore për fëmijë, të cilat janë botuar në gazetën dhe revistën me të njëjtin emër: "Sirena e Vogël". Gjithashtu ka shkruar disa artikuj në revistën për të rinj "Bota Ime" si dhe në gazeta e buletine të ndryshëm që lidhen me mjekësinë apo të drejtat e fëmijëve. Ka qenë gjithmonë e interesuar për të përsosur aftësitë e saj në gjuhët e huaja, ka përkthyer për aktivitete të ndryshme ndërkombëtare që në vitet e studimit. Ka përkthyer materiale të ndrsyshme për Televizionin CNN gjatë 5 muajve të Krizës Kosovare të vitit 1999. Ka ndihmuar për të përkthyer dhe redaktuar materialet e disa dokumentarëve për Shqipërinë, prodhime të Offramp Film Inc. New York, Zyrës Qëndrore të UNICEF-it në New York si dhe Televizionit Francez TV5. Që prej katër vjetësh punon në Zyrën e UNICEF-it në Tiranë si përgjegjëse për programet e Shëndetit të të Rinjve, por gjithmonë gjen kohë për t'u marrë me pasionin e saj të vjetër: përkthimin letrar. Në dy-tre vitet e fundit ka bashkëpunuar me Shtëpinë Botuese Elite Tiranë, duke u angazhuar herë pas here për përkthimin dhe redaktimin e disa teksteve e materialeve në Gjuhën Angleze. Aktualisht po punon për përkthimin në Gjuhën Shqipe të librit "Monika Levinski".

Saimir Nasi, IT Specialist & Graphic Design & Asistent Ekzekutiv. Lindi në vitin 1974. Ka mbaruar studimet e larta në Fakultetin e Drejtësisë të Universitetit të Tiranës. Ka njohuri shumë të mira në fushën kompjuterike. Gjatë viteve 1997-2002 ka punuar pranë Alba TV, si dhe RTV KOHA, kurse aktualisht punon pranë Radio Televizionit Satelitor Kombëtar ALSAT në Tiranë, ku kryen detyrën e Përgjegjësit të Montazhit Jo-linear. Gjatë viteve 1998-2003 ka punuar në mënyrë sistematike si bashkëpunëtor i jashtëm pranë Shtëpisë Botuese Elite si IT Specialist & Graphic Design, duke përballuar me sukses të gjitha kërkesat që kanë të bëjnë me parapërgatitjen dhe botimin e librave të cilësisë së lartë, siç janë: faqosja, paraqitja grafike dhe realizimi me fantazi i kopertinave, çka ka bërë që të gjitha seritë e botimeve Elite të mirëpriten nga lexuesit shqiptarë. Zotëron gjuhët e huaja: anglisht dhe italisht.

Dritan Nasi, Piktor Ilustrues & Asistent Ekzekutiv. Lindi në vitin 1968. Ka mbaruar studimet e larta në Fakultetin e Gjuhës dhe të Lertërsisë Shqipe në Universitetin e Tiranës dhe është diplomuar Mësues i Gjuhës dhe Letërsisë Shqipe. Në vitin 2004 përfundoi edhe Akademinë e Arteve të Bukura Tiranë. Aktualisht punon pranë Bashkisë së Qytetit Tiranë në Sectoring e Kulturës. Studimet e mesme i ka mbaruar në Liceun Artistik Jordan Misja në Tiranë, ku është diplomuar për skenografi. Është piktor i talentuar, pjesëmarrës në ekspozita kombëtare të hapura pranë Galerisë Arteve në Tiranë, si dhe iniciator për hapjen e disa ekspozitave personale brenda dhe jashtë vendit, si në Spanjë, Francë, Danimarkë, Suedi dhe në Itali, ku ka marrë vlerësime të kënaqshme nga ekspertë e kritikë të mirënjohur të Arteve të Bukura. Është i njohur si piktor dekorativ e peisazhist, por talenti i tij më i spikatur bie në sy sidomos në fushën e botimeve, ku është shquar si piktor ilustrues. Bashkëpunon me mjaft botues shqiptarë, si për realizimin e kopertinave të librave, ashtu edhe për ilustrimin e veprave të ndryshme, veçanërisht të botimeve për fëmijë. Është autor i vëllimit me poezi Retinë Eklipsesh, botuar nga Shtëpia Botuese Monroe, ribotuar nga Shtëpia Botuese Elite. Gjatë viteve 1968-2003 ka bashkëpunuar me Shtëpinë Botuese Elite si piktor ilustrues, duke përballuar njëkohësisht të gjitha problemet që kanë të bëjnë me paraqitjen grafike të botimeve. Aktualisht drejton Serinë e Botimeve Elite: Këndi i Fëmijëve. Zotëron gjuhët e huaja: anglisht dhe italisht, komunikon edhe në gjuhën spanjolle.